Decisión do xurado para a VI edición do premio Plácido Castro [2006]

[23 de xaneiro de 2007]

O xurado do premio Plácido Castro de Tradución, reunido en Baiona o 20 de xaneiro de 2007, decidiu outorgarlles o premio correspondente a 2006 ex aequo a Xoán Montero Domínguez, pola tradución de O banqueiro anarquista, de Fernando Pessoa, e a Ekaterina Guerbek (texto revisado por Maite Veiga), pola tradución de Diario dun tolo de Nikolai Gógol.

 

Bivir galardoada no XVI Premio da Asociación de Libreiros

[27 de marzo de 2007]

A biblioteca Bivir da Asociación de Tradutores Galegos recibiu o pasado día 23 o Premio da Asociación de Libreiros, na súa modalidade de Medios de Comunicación e Novas Tecnoloxías. Xulián Maure, fundador da biblioteca, pronunciou unhas palabras nas que resaltou a importancia que teñen as novas tecnoloxías para familiarizar o público coa lectura. O libro impreso en papel e o libro dixital non son inimigos e poden complementarse para conseguir aumentar os índices de lectura no país. O anterior presidente da ATG engadiu que Bivir é unha biblioteca pública, que recibe un grande número de visitas, e que polo tanto debería ser financiada con diñeiro público.

A ATG quere agradecerlles ós libreiros este premio, pois supón o recoñecemento do traballo dos membros da asociación e tamén do papel que van ter as novas tecnoloxías, nun futuro non moi afastado, na difusión dos textos en galego.